ၶူင်းၵၢၼ်တႄႇမီးမႃးမိူဝ်ႈလႂ်ႈလႄႈၵွပ်ႈသင်လႄႈလႆႈမီးမႃး

​

 ၵေႃတႆးလႆႈတူင်ႉၼိုင်ႁဵတ်းၵၢၼ်မႃး ၼႂ်းတူင်ႇဝူင်းမူႇမုၵ်ႉၽုင်ၵူၼ်းတႆး တီႈပွတ်းတွၼ်ႊမိူင်းတႆးပွတ်းၵၢင်လႄႈ ပွတ်းၸၢၼ်း တင်ႈတႄႇမိူဝ်ႈပီႊ 1999 သေ လႆႈမီးတူဝ်ထူပ်းမႃးၶၢဝ်းတၢင်းပႅတ်ႇပီႊသေယဝ်ႉ လႆႈႁူႉပွင်ႇမႃးဝႃႈ ပေႃး ဢမ်ႇပိုၵ်ႉ ၽိုၵ်းၵူၼ်းၼုမ်ႇၼႂ်းတူင်ႇဝူင်းၵူၼ်း ႁႂ်ႈပဵၼ်မႃးၽူႈၼၢမ်းၼႂ်းတူင်ႇတၢင်ႇၶဝ်ၶိုၼ်းၸိုင် တႃႇတေၵေႃႇသၢင်ႈ ႁႂ်ႈၸူဝ်ႊပၢၼ်ၵူၼ်းမိူင်းတႆးႁဝ်းလီလိူဝ်မႃးၼၼ်ႉ ဢမ်ႇပဵၼ်လႆႈလႃးလႃး။ လူၺ်ႈတၢင်းယိူင်းဢၢၼ်း တႃႇတေပိုၵ်ႉ ၽိုၵ်းၵူၼ်းၼုမ်ႇတႆး ႁႂ်ႈပဵၼ်မႃးၽူႈသၢင်ႈတူင်ႇဝူင်းၵူၼ်းသေ “ၵေႃတႆး”ၵေႃႈ ၸင်ႇလႆႈတႄႇတင်ႈမႃး ၶူင်းၵၢၼ် ၵၢၼ် ယုၵ်ႉလမ်ႉၵတ်ႉၵူၼ်းၼုမ်ႇတႆး မိူဝ်ႈ 2007 ။ မိူဝ်ႈတႄႇႁႅၵ်ႈၼၼ်ႉ တင်းသဵင်ႈမီးၵူၼ်းၼုမ်ႇ 13 ၵေႃႉ လုၵ်ႈတီႈတူင်ႇ တၢင်ႇ ၼႂ်းၵႃလီႉလႄႈဝဵင်းၵုၼ်ႁဵင်မႃးတင်းလၢႆ။ ဝၢႆးသေ ႁဵတ်းသၢင်ႈမႃးလၢႆပီႊသေ လႆႈတၢင်းဢွင်ႇမၢင်ႇမႃး ပီႈၼွင်ႉ ၵူၼ်းမိူင်းတႆးၵေႃႈ မီးလွင်ႈယုမ်ႇယမ်ၼိူဝ်တၢင်းႁဵတ်းသၢင်ႈ “ၵေႃတႆး”မႃးသေလႄႈ ယၢမ်းၸင်ႇၼႆႉတႄႉ ၵူၼ်းၼုမ်ႇ ၸိူဝ်းမႃးၶဝ်ႈႁူမ်ႈၶူင်းၵၢၼ်ၼႆႉ မိူင်းတႆးပတ်းပိုၼ်ႉၵွၺ်းဢမ်ႇၵႃး ပႃးၸဵမ်ၸေႊမိူင်းၶၢင်၊ ၸေႊတိူင်းမၢၼ်းတလေး၊ ၸေႊတူိင်းပႃႇၵိူဝ်(ပၵူဝ်း) ၸိူဝ်းၼႆႉလႂ် ယူႇယဝ်ႉ။ တင်ႈတႄႇပီႊ 2007 ထိုင် 2014 ၼီႈမႃးၼႆႉ “ၵေႃတႆး” လႆႈပိုၵ်ႉ ၽိုၵ်းမႃး လုၵ်ႈႁဵၼ်း 347 ၵေႃႉသေ ပီႊ 2015 ၼႆႉ သမ်ႉပေႃးထိုင်မႃး ၸုပ်ႈထူၼ်ႈထီႈ 9 ယူႇယဝ်ႉ။

 

ၶူင်းၵၢၼ် ၵၢၼ်သၢင်ႈလမ်ႉၵတ်ႉၵူၼ်းၼုမ်ႇတႆး တင်ႈမီးဝႆႉတီႈလႂ်

 

မိူဝ်ႈတႄႇမၼ်း တႃႇလွင်ႈႁူမ်ႇလူမ်ႈလႄႈသင် တႃႇလွင်ႈဢၼ်ပိူၼ်ႈၶႂ်ႈႁပ်ႉတွၼ်ႈၼၼ်ႉလႄႈသင် ၵေႃတႆး ႁႃတီႈပၵ်း သဝ်း ယၢပ်ႇယိူၼ်းဝႆႉယူႇၼင်ႇၵဝ်ႇ။ ၵၢမ်ႇလီလူင်လၢင်သေ လႆႈမီးတပ်ႉၸုမ်းမၢႆ(7)၊ တပ်ႉသိုၵ်းၸိုင်ႈတႆး ႁပ်ႉတွၼ်ႈ  ႁႂ်ႈလႆႈတႄႇတင်ႈၶူင်းၵၢၼ် ၵၢၼ်ယုၵ်ႉလမ်ႉၵတ်ႉၵူၼ်းၼုမ်ႇတႆးမႃးယူႇယဝ်ႉ။ တီႈတင်ႈသဝ်းသမ်ႉ မီးဝႆႉယူႇတီႈ ၸေႊဝဵင်းၵႃလီႉသေ ပေႃးလုၵ်ႉတၢင်းဝဵင်းတူၼ်ႈတီႈ ၶပ်းလူတ်ႉၵႃးၸိုင် တေႁိုင်ယူႇမွၵ်ႈ 6 ထိုင် 7 ၸူဝ်ႊမူင်း။ ပဵၼ် ဢွင်ႈတီႈ ဢၼ်ဢမ်ႇပေႃးယႂ်ႇႁႅင်းသေ မီးလွင်ႈၵတ်းယဵၼ်ၼိမ်သဝ်းဝႆႉယူႇ။ ႁိမ်းႁွမ်းမီးထိူၼ်ႇမႆႉဢိၵ်ႇတူၼ်းလွၺ် လွမ်ႉႁွပ်ႈဝႆႉသေ မီးၼမ်ႉႁူၺ်ႈၼမ်ႉႁွင်ႊ လေႃႈလႆဝႆႉ။ “ၵေႃတႆး” ၵေႃႇတင်ႈၶူင်းၵၢၼ်ၽိုၵ်းသွၼ်ယူႇဝႆႉၼႂ်းၵၢင်သူၼ်၊ လုၵ်ႉတီႈသူၼ်ၼၼ်ႉသေၵေႃႈ လုၵ်ႈႁဵၼ်းဢိၵ်ႇၽူႈၽိုၵ်းသွၼ် လႆႈယူႇသဝ်း ႁဵၼ်းႁူႉၸွမ်းၵၼ်၊ လႆႈၽုၵ်ႇသွမ်ႈႁုင် မိုဝ်ႉ မိူၼ်ၼင်ႇပဵၼ်မုင်ႉႁေႃႁိူၼ်းလဵဝ်ၵၼ်။

 

ၽိုၵ်းသွၼ်ဢီႈသင်လၢႆလၢႆလႄႈ ၽိုၵ်းသွၼ်ၸိူင်ႉၼင်ႇႁိုဝ်

 

ယိူင်းဢၢၼ်းၶူင်းၵၢၼ်ၽိုၵ်းသွၼ်ၼႆႉၸမ်း တႃႇႁႂ်ႈမီးမႃး ၽူႈသၢင်ႈတူင်ႇဝူင်းၵူၼ်း ဢၼ်ၾင်ၸႂ်တႃႇႁဵတ်းၵၢၼ် ဝၢႆး သေၸူပ်းယဝ်ႉၶူင်းၵၢၼ်ၽိုၵ်းသွၼ်။ ၵွပ်ႈၼႆလႄႈ လၵ်းႁဵၼ်းၵေႃႈ လႆႈဢိင်ၼိူဝ်တၢင်းယိူင်းဢၢၼ်းသေ ၽိုၵ်းသွၼ် ပၼ်ယူႇယဝ်ႉ။ ပၢႆးပိူင်လူင် ဢၼ်ပဵၼ်လွၼ်ႉၵႅၼ်ၶွင်ၶူင်းၵၢၼ်ၼႆႉၸမ်း ပဵၼ် “ၾိင်ႈတႅတ်ႈလႄႈလၢႆးႁဵတ်းသၢင်ႈ ၵၢၼ်သၢင်ႈတၢင်ႉႁႅင်းၵူၼ်းမိူင်း” ဢိၵ်ႇပႃးတူဝ်ယၢင်ႇ ဢၼ်ၵူၼ်းၼႂ်းလုမ်ႈၾႃႉ သၢင်ႈတၢင်ႉႁႅင်းၵူၼ်းမိူင်း ၸိူဝ်းၼႆ လႂ်ယဝ်ႉ။ ၵွပ်ႈၼႆ တႃႇတေပွင်ႇၸႂ် ပိူင်ၾၢင်ႁၢင်ႊလွင်ႈၶွင်ႈၶမ်၊ ၾိင်ႈတိုၼ်းပဵၼ်လွင်ႈၶွင်ႈၶမ်၊ ယူင်ႉတဵၵ်းတဵင်လႄႈ လၢႆးၵူၼ်းဝၢၼ်ႈၵူၼ်းမိူင်းၵေႈလိတ်ႈလွင်ႈၶွင်ႈၶမ်တူဝ်ၵဝ်ႇ၊ လွင်ႈၵူၼ်းမူိင်းလႆႈၺႃးတၢမ်ႇသိုၵ်းၵၢင်မိူင်းၼၼ်ႉ လုၵ်ႈႁဵၼ်းၶဝ် လႆႈလူင်းၵႂႃႇၼႂ်းဝၢၼ်ႈၼႂ်းၶူင်ႇၵူၼ်းမိူင်းသေ ႁဵၼ်းႁူႉၸွမ်းလၢႆးပိူင်တူဝ်ထူပ်းယူႇယဝ်ႉ။ လုၵ်ႉတီႈ ဢၼ်လုၵ်ႈႁဵၼ်းၶဝ် လႆႈႁၼ်လႆႈႁူႉလႆႈႁဵၼ်းမႃးၼၼ်ႉသေ ၸင်ႇၶိုၼ်းမႃးဢုပ်ႇဢူဝ်း ထတ်းသၢင်ႈၸၵ်းယွၺ်ႈ ႁႃ လၢႆးၵေႈလိတ်ႈတႃႇတိူဝ်းလီလိူဝ်။

 

ၽူႈသၢင်ႈတူင်ႇဝူင်းၵူၼ်းဢၼ်ဝႃႈၼႆႉ ၵွမ်ႉၵႃႊၽိုၵ်းႁဵၼ်းတီႈၶူင်းၵၢၼ်သေယဝ်ႉ ၵိုင်ႉၵၢင်ႉၶီႉၶႃႉပဵၼ်မႃး ငၢႆႈငၢႆႈဢမ်ႇ ၸႂ်ႈၼင်ႇၵဝ်ႇ။ လူဝ်ႇလႆႈပဵၼ်ၵူၼ်းဢၼ်ပၵ်းၸႂ်သႂ်ႇၶေႃး ၼႂ်းၼႃႈၵၢၼ်တူင်ႇဝူင်းၵူၼ်းသေဢမ်ႇၵႃး ဢၼ်တိူဝ်းလမ်ႇ လွင်ႈၸမ်း လူဝ်ႇလႆႈပဵၼ်ၽူႈဢၼ်ႁၵ်ႉႁွမ်လွင်ႈငမ်းယဵၼ်၊ လွင်ႈတြႃးၽႃႇၵၢင်ဝၢင်းၶိုင်ႈ တီႈၼႂ်းတူင်ႇဝူင်းၵူၼ်းတူဝ် ၸဝ်ႈၵဝ်ႇပႃးလူးၵွၼ်ႇ။ တႃႇႁႂ်ႈလုၵ်ႈႁဵၼ်း ႁူႉပွင်ႇထုိင် လၢႆးသၢင်ႈလွင်ႈငမ်းယဵၼ် ဢၼ်ဢမ်ႇၸႂ်ႉလွၵ်းလၢႆးႁၢဝ်ႈႁၢႆႉ ၼၼ်ႉ လႆႈၸႂ်ႉတိုဝ်းၶၢဝ်းယၢမ်းတင်းႁိုင်၊ လူဝ်ႇလႆႈႁႂ်ႈလုၵ်ႈႁဵၼ်း ႁူပ်ႉႁၼ်လႄႈႁဵၼ်းႁူႉ တူဝ်ယၢင်ႇ ဢၼ်ၵိူတ်ႇပဵၼ် ယူႇတီႈၼႂ်းတူင်ႇဝူင်ႇၵူၼ်းႁဝ်းၼၼ်ႉတေႉတေႉ။ ၵူၼ်းၼုမ်ႇတႆး ၸိူဝ်းဢၼ်ယႂ်ႇမႃႈၵႃႊသုင်မႃးၼႂ်းမိူင်းတႆးဝၼ်း မိူဝ်ႈလဵဝ်သေ ႁူပ်ႉထူပ်းလွင်ႈၶွင်ႈၶမ်ယူႇၼၼ်ႉ ၵမ်ႈၼမ် ၶဝ်တေလႆႈႁၼ်ဝႃႈ လၢႆးၵေႈလိတ်ႈလွင်ႈၶွင်ႈၶမ်ၼႆႉ လူဝ်ႇ လႆႈၸႂ်ႉတိုဝ်းလွၵ်းလၢႆးႁၢဝ်ႈႁႅင်း။ ၵွပ်ႈၼႆ ၼင်ႇႁိုဝ် တေလႅၵ်ႈလၢႆႊ ပိုတ်ႇပၢင်ႇပၼ် ပၢႆးႁပ်ႉႁၼ်လုၵ်ႈႁဵၼ်းၵူၼ်းၼုမ်ႇ ၼၼ်ႉ လႆႈပိုၵ်ႉၽိုၵ်းပၼ် ႁႂ်ႈၶဝ်မီးတၢင်းၸႂ်ယၢဝ်း၊ ႁႂ်ႈမေႃဝႆႉၵႃႊၶၼ်လွင်ႈၽွမ်ႉႁူမ်ႈၵၼ်ႁဵတ်းသၢင်ႈၵၢၼ်၊ ႁႂ်ႈၶဝ်မေႃ ႁၢပ်ႇႁပ်ႉဢဝ်ပုၼ်ႈၽွၼ်း၊ ႁႂ်ႈမေႃႁၵ်ႉသႃပႂ်ႉပႃးၸိူဝ်ႉၶိူဝ်းတူဝ်ၵဝ်ႇ။ လုၵ်ႈႁဵၼ်းၸိူဝ်းမႃးႁဵၼ်းၼၼ်ႉ ၸႅၵ်ႇပဵၼ်ၸုမ်း ပဵၼ်ၸုမ်းသေ ႁဵတ်းၵၢၼ်လၢႆလၢႆယၢင်ႇ- ၸိူင်ႉၼင်ႇ ၵၢၼ်ၽုၵ်ႇသွမ်ႈ၊ ၵၢၼ်လဵင်ႉသတ်း၊ ၵၢၼ်ႁုင်မိုဝ်ႉ၊ ၵၢၼ်သိုဝ်ႉ ၸၢႆႇၶူဝ်းၶွင်၊ ၵၢၼ်ႁၢင်ႈႁႅၼ်းဢွၵ်ႇ ၶၢဝ်းတၢင်းလဵပ်ႈႁဵၼ်း။ လုၵ်ႉတီႈလွင်ႈႁူမ်ႈၵၼ်ႁၢပ်ႇႁပ်ႉပုၼ်ႈၽွၼ်းလဵၵ်ႉလဵၵ်ႉ ၸိူဝ်းၼႆႉလူၺ်ႈၵၼ်သေ လုၵ်ႈႁဵၼ်းတေႁဵၼ်းႁူႉ လၢႆးဝႆႉၸႂ်ယၢဝ်းယၢဝ်း ႁူမ်ႈၵၼ်ၵေႈလိတ်ႈလွင်ႈၶွင်ႈၶမ်၊ ႁဵၼ်းႁူႉ လၢႆးၵေႈလိတ်ႈလွင်ႈၶွင်ႈၶမ်ၼႂ်းၵႄႈၶဝ်ၼင်ႇၵၼ်။ လိူဝ်ၼႆႉဢမ်ႇၵႃး လုၵ်ႈႁဵၼ်းၶဝ် ႁဵၼ်းႁူႉပႃး လွင်ႈမေႃဢဝ်ပုၼ်ႈ ၽွၼ်း တၢင်းႁဵတ်းတၢင်းသၢင်ႈၶဝ်ၵူႊၸိူဝ်ႉၵူႊလွင်ႈ (လႆႈဝႃႈပဵၼ် တွၼ်ႊဢၼ်ယၢပ်ႇတႃႇၽိုၵ်းတေႉတေႉ)။

 

ၽူႈၵပ်းသၢၼ်ၶူင်းၵၢၼ်လႄႈမေႃသွၼ်

​

ၶူင်းၵၢၼ် ၵၢၼ်ယုၵ်ႉလမ်ႉၵတ်ႉၵူၼ်းၼုမ်ႇတႆးၼႆႉ ၽူႈၵုမ်းၵၢၼ် ပဵၼ်ၸၢႆးၽူင်းၶွင်ႇ၊ ယဝ်ႉဢမ်ႇၵႃး ၸၢႆးၽူင်းၶွင်ႇ ယင်းပဵၼ်ပႃး ၽူႈၵပ်းသၢၼ်ၶူင်းၵၢၼ်သေ ပဵၼ်မေႃသွၼ် ပၢႆးၵၢၼ်သၢင်ႈတၢင်ႉႁႅင်းၵူၼ်းမိူင်း။ ၼွၵ်ႈသေၸၢႆးၽူင်း ၶွင်ႇယဝ်ႉၼၼ်ႉ မီးပႃးမေႃသွၼ် ၸိူဝ်းႁဵၼ်းသုတ်းၸၼ်ႉၸွမ်ၼွၵ်ႈမိူင်းလၢႆလၢႆၵေႃႉ ႁူမ်ႈသွၼ်ပၼ် ပၢႆးသၢႆႊလွင်ႈ တူင်ႇဝူင်းၵူၼ်း(Social Sciences)၊ လွင်ႈၼမ်ႉၵတ်ႉၽႃႇသႃႇဢင်းၵိတ်ႉ(English 4 skills) ဢိၵ်ႇပႃးတင်း ပၢႆးပႆႇ ၺႃႇလွင်ႈပဵၼ်ၵူၼ်းမူိင်းလီ(Civic Education)။ လုၵ်ႈႁဵၼ်း ၸိူဝ်းဢၼ်ႁဵၼ်းယဝ်ႉ ၵႃႈတီႈၶူင်းၵၢၼ် ၵၢၼ်ယုၵ်ႉ ၼမ်ႉၵတ်ႉလိၵ်ႈဢင်းၵိတ်ႉ တီႈတႃႈၵုင်ႈၶဝ်ၸိူဝ်းၼၼ်ႉၵေႃႈ မႃးၵမ်ႉၸွၺ်ႈ ၼႂ်းၵၢၼ်ၸတ်းၵၢၼ်လႄႈ ၵၢၼ်သွၼ် လၢႆလၢႆပၢႆးသေဢမ်ႇၵႃး ၸွၺ်ႈထႅမ်ပႃး ၵၢၼ်ၸတ်းၵၢၼ်သူၼ်၊ ၸတ်းၵၢၼ်ပႃး ၵၢၼ်ဢွၵ်ႇၶၢဝ်းတၢင်းလဵပ်ႈႁဵၼ်း ဢိၵ်ႇတင်းၸွၺ်ႈပႃးလုၵ်ႈ ႁဵၼ်းၸိူဝ်းဢၼ်ႁဵၼ်းထိူင်းၶဝ်ၸိူဝ်းၼၼ်ႉလႂ်ယူႇယဝ်ႉ။

 

လုၵ်ႈႁဵၼ်း လုၵ်ႉတီႈလႂ်မႃးလၢႆလၢႆ

 

မိူၼ်ၼင်ႇ ၶူင်းၵၢၼ်တၢင်ႇၸိူဝ်းၶွင် “ၵေႃတႆး” ၼၼ်ႉ  လုၵ်ႉႁဵၼ်းၵေႃႈ လုၵ်ႉတီႈ မိူင်းတႆးပတ်ႉပိုၼ်ႉဢမ်ႇၵႃး၊ ပႃးၸဵမ် တင်း ၸေႊမိူင်းၶၢင်၊ ၸေႊတိူင်းမၢၼ်းတလေး၊ ၸေႊတိူင်းပႃႇၵိူဝ်၊ ၸေႊတူိင်းၸၵႅင်း ၸိူဝ်းၼႆႉမႃး။ လုၵ်ႈႁဵၼ်း ၸိူဝ်းမႃး ႁဵၼ်းတီႈၶူင်းၵၢၼ်ဢၼ်ၼႆႉ လႆႈႁပ်ႉသူးၵၢၼ်ႁဵၼ်း(ႁဵၼ်းလၢႆႊလၢႆႊ)၊ မီးလွင်ႈ လုမ်းလႃးပိုၼ်ႉထၢၼ်ပၢႆး ယူႇလီ(လၢႆႊလၢႆႊ)ပၼ်၊ ၶဝ်ႈၼမ်ႉတၢင်းၵိၼ်လႄႈတီႈယူႇတီႈသဝ်းၵေႃႈ လုၵ်ႉတီႈ “ၵေႃတႆး” ႁၢင်ႈႁႅၼ်းပၼ် ႁႂ်ႈပဵၼ် ၼႂ်းၶၵ်ႉတွၼ်ႊ သူးၵၢၼ်ႁဵၼ်း တေႃႇပေႃးထိုင်ၸုပ်ႈထီႈ(8)။ ၵူၺ်းၼႃႇ တင်ႈတႄႇ ပီႊ 2015 မႃးၼႆႉတႄႉ လုၵ်ႉတီႈ “ၵေႃတႆး”သေ လႆႈၵဵပ်းငိုၼ်း လုၵ်ႈႁဵၼ်းယေႈၵေႃႉ 160000 ပျႃး တႃႇတင်းပီႊ။

 

လုၵ်ႈႁဵၼ်းၸိူဝ်းတေမႃးႁူမ်ႈၶူင်းၵၢၼ်ၼႆႉၸမ်း ပိုၼ်ႉထၢၼ် တေလႆႈမေႃလၢတ်ႈၵႂၢမ်းတႆးလႄႈ မေႃလူမေႃတႅမ်ႈလိၵ်ႈ တႆး ၸၼ်ႉၵၢင်၊ တေလႆႈသုတ်းယဝ်ႉႁူင်းႁဵၼ်းၸၼ်ႉသုင်သေ မီးၵၢင်ၸႂ် ၶႂ်ႈႁၢပ်ႇႁၢမ်ႁဵတ်းသၢင်ႈတႃႇၽွၼ်းလီတူင်ႇ ဝူင်းၵူၼ်း။

 

ၼႂ်းၶၢဝ်းယၢမ်း 8 လိူၼ် ၼင်ႇႁိုဝ်တေဢမ်ႇၵိူတ်ႇပဵၼ်လွင်ႈၶွင်ႈၶမ်သင်သေၸိူဝ်ႉသေလွင်ႈၼၼ်ႉ လုၵ်ႈႁဵၼ်းတေ လႆႈၸွမ်းပိူင် ၼင်ႇတမ်းဝၢင်းဝႆႉ။ ၼႂ်းၶၢဝ်းယၢမ်း 8 လိူၼ်ၼႆႉ တေဢမ်ႇလႆႈသူႈယႃႈ၊ တေဢမ်ႇလႆႈၵိၼ်လဝ်ႈ၊ တေ လႆႈၵၢင်းယၢၼ်တင်းယႃႈမဝ်းၵမ်ႊတင်းသဵင်ႈတင်းလူင်။ ဢိင်ၼိူဝ် ၶေႃႈတုၵ်းယွၼ်းဢူႈမႄႈလုၵ်ႈႁဵၼ်းၵႃႈပူၼ်ႉမႃး သေ လွင်ႈဝႆႉၸူႉဝႆႉၸူဝ်းၼႆႉၵေႃႈ ႁေႉႁမ်ႈဝႆႉတေႃႇ ပေႃးသုတ်းယဝ်ႉႁဵၼ်း။

 

လွင်ႈၵမ်ႉထႅမ်ငိုၼ်းတွင်း

 

ၶူင်းၵၢၼ် ၵၢၼ်ယုၵ်ႉလမ်ႉၵတ်ႉၵူၼ်းၼုမ်ႇတႆးၼႆႉ ငိုၼ်းၵမ်ႉထႅမ်ၵမ်ႈၼမ် ပဵၼ်ၵူၼ်းမိူင်းၵမ်ႉထႅမ်သေ၊ လႆႈႁပ်ႉ ငိုၼ်းၵမ်ႉထႅမ် မၢင်ႊၽွင်ႈ ၵႃႈတီႈ Euro Burma Office ။ တီႈလိၼ်ၽုၵ်ႇသွမ်ႈ၊ ဢွင်ႈတီႈလုမ်း၊ ဢွင်ႈတီႈယူႇသဝ်း ၸမ်း ပဵၼ်ၵူၼ်းမိူင်းလႄႈ ၸုမ်း Euro Burma Office ၵမ်ႉထႅမ်ၵႃႊၸႂ်ႉၸၢႆႇ။

 

 

လွင်ႈဢွင်ႇမၢင်ႇ ဢၼ်လႆႈမႃး

 

ယွၼ်ႉပိူဝ်ႈၵူၼ်းမူိင်းၵမ်ႉထႅမ်လႄႈၸဝ်ႈတႃႇၼငိုၼ်းၵမ်ႉထႅမ်တင်းလၢႆၵမ်ႉထႅမ်သေ ၶူင်းၵၢၼ်ၼႆႉ တင်ႈတႄႇ ႁဵတ်းသၢင်ႈမႃး ၶၢဝ်းယၢမ်း 9 ပီႊ သမ်ႉပေႃးယဝ်ႉတူဝ်ႈမႃးထိုင် ၸုပ်ႈထူၼ်ႈထီႈ 9 လီငၢမ်းယူႇယဝ်ႉ။

1. ၸုပ်ႈထူၼ်ႈ (1) - မီးလုၵ်ႈႁဵၼ်း 23 ၵေႃႉ

2. ၸုပ်ႈထူၼ်ႈ (2) - မီးလုၵ်ႈႁဵၼ်း 13 ၵေႃႉ

3. ၸုပ်ႈထူၼ်ႈ (3) - မီးလုၵ်ႈႁဵၼ်း 33 ၵေႃႉ

4. ၸုပ်ႈထူၼ်ႈ (4) - မီးလုၵ်ႈႁဵၼ်း 44 ၵေႃႉ

5. ၸုပ်ႈထူၼ်ႈ (5) - မီးလုၵ်ႈႁဵၼ်း 44 ၵေႃႉ

6. ၸုပ်ႈထူၼ်ႈ (6) - မီးလုၵ်ႈႁဵၼ်း 53 ၵေႃႉ

7. ၸုပ်ႈထူၼ်ႈ (7) - မီးလုၵ်ႈႁဵၼ်း 52 ၵေႃႉ

8. ၸုပ်ႈထူၼ်ႈ (8) - မီးလုၵ်ႈႁဵၼ်း 67 ၵေႃႉ

9. ၸုပ်ႈထူၼ်ႈ (9) - မီးလုၵ်ႈႁဵၼ်း 48 ၵေႃႉ